Predstava je zasnovana kako na istorijskim likovima Stjepana Zanovića i njegovog brata Primislava, tako i na postupcima mistifikacije kojom su nadograđivali svoje identitete, a koja je bila polazište za kreaciju i drugih likova u predstavi. Uz pomoć sjajnihglumačkih interpretacija i duhovitog teksta, predstava na ironičan način govori oaktuelnim temama kao što su potreba za prekrajanjem istorijskih događaja ili mijenjanje identiteta.
Reditelj Ivan Penović je otkrio da mu je prijatelj predložio da pročita djela Stjepana i Miroslava Zanovića i da je odatle sve krenulo.
“On je meni te knjige predstavio na jedan jako zabavan način, rekao mi je da su fantastični, da su prvi u svijetu doveli avanturizam do te mjere da su uspjeli shvatiti sisteme, u smislu šta sve možeš bez lične karte, zatim pitanje identiteta, izmjena identiteta, koliko izmjenom lokaliteta, s obzirom da su oni mnogo putovali, mijenjaš ono što jesi unutar novog okruženja. I sve ono do čega dolazimo kasnije. Lik Mama Ubu, koji jeste književni lik, je izašao iz same ove ideje da sam prvo htio da prikažem istorijske ličnosti u tom njihovom aktuelnom trenutku koji su prošli i da je postavim u današnje vrijeme u formatu televizijske emisije koja je sama po sebi diktatorijalni aparatus, uslovljava i traži određene senzacije koje nisu nužno vezane uz istinu, ali ni uz ono najvrijednije što čovjek ima, već traže od tebe da ne promijeniš kanal, drže ti pažnju koliko mogu. Na taj način je došlo do ovih drugih likova, do jedne pseudo naučne istoričarke, do književnog lika pa zatim i do istorijskih ličnosti. Kako njih sve spojiti u današnje vrijeme, kako ih staviti u TV šou i gledati kako će da se ponašaju. Taj aparatus TV emisije jeste oblikovao sama događanja na sceni.”, objasnio je Penović.
Predstava bi se mogla okarakterisati kao društvena parodija, a Penović ističe da čega god se dohvati, nekako uspije da napravi komediju.
U komadu su igrali Livio Badurina, Bernard Tomić, Silvio Vovk, Lana Barić i Nina Violić.
